Raja Herodes Nyiksa Para Kraman Sang Hyang Yesuse
12
Duk galahe punika,
raja Herodes Agripa ngawitin nyiksa makudang para krama druen Sang Hyang Yesuse.
2 Tur ida mrentahang mangda dane Yakobus,
semeton dane Yohanesea,
kapademang nganggen pedang.
3 Ritatkala raja Herodes nyingakin yening parilaksana ngamademang dane Yakobus punika nyenengin manah para pemimpin Yahudine,
irika raris ida taler mrentahang mangda ngejuk dane Petrus.
Duk punika sedek rarainan Roti Tanpa Ragi sane taler kaucap rarainan Paskah.
4 Sasampune dane Petrus kaejuk,
dane raris kakrangkeng ring buine.
Turmaning dane kajaga olih tentara petang seka;
suang-suang seka akehne petang diri.
Tatujone mangda sasampune rarainan Paskah ida mresidayang ngadilin dane ring arepan anake akeh.
5 Ritatkala dane Petrus kakrangkeng ring buine,
para krama druen Sang Hyang Yesuse seleg nunas ica ring Sang Hyang Pengardi.
Dane Petrus Kabebasang olih Malekat Sang Hyang Pengardi
6 Ritatkala wengi sadereng dane Petrus kaadilin olih raja Herodes,
dane Petrus sirep ring buine.
Makakalih tangan danene kategul nganggen rante sareng-sareng tentarane kakalih sane wenten ring kenawan lan kebot danene.
Wenten pada tentara-tentara lianan sane nyaga ring korin buine.
7 Jeg saget,
wenten malekat Sang Hyang Tunggale ngadeg ring kamar buine,
tur wenten sinar galang ring kamare punika.
Malekate raris ngeplakin palan dane Petrus mangda matangi.
Tur malekate punika mabaos sapuniki,
“Enggalang ja bangun!”
Duk punika rante ring tangan dane Petruse keles.
8 Raris malekate punika mabaos sapuniki,
“Anggon ja slempot lan sandal ragane.”
Raris dane Petrus ninutin baos malekate punika.
Malih malekate punika mabaos sapuniki,
“Anggon ja jubah ragane tur tugtug ja tiang.”
9 Irika raris dane Petrus nugtug malekate punika medal.
Nanging dane nenten uning,
yening napi sane kalaksanayang olih malekate punika yakti mamargi.
Dane ngaden dewek danene wantah nyingak pelawatan kamanten.
10 Sasampune ipun sareng kalih ngliwatin genah para tentarane sane kapertama lan kakalih,
ipun rauh ring kori pamedal besine sane nuju kota.
Korin pamedale punika maampakan didiana,
raris ipun medal saking buine.
Ipun mamargi ngliwatin rurung sane cupit.
Irika saget malekate punika ngalain dane Petrus.
11 Raris dane Petrus eling kapining deweknyane tur mabaos sapuniki,
“Jani mara tiang seken-seken nawang unduk Sang Hyang Tunggal ngutus malekat Idane.
Tatujone mangda Ida nylametang tiang uling kuasan raja Herodes tur uling sekancan ane dot kalaksanayang olih Bangsa Yahudine tekening tiang.”
12 Sasampune dane ngresepang indike punika,
raris dane luas nuju umah Ni Maria,
ibun dane Yohanese.
Dane Yohanes punika taler kasambat Markus.
Irika wenten akeh anak mapunduh nunas icayang dane Petrus.
13 Ritatkala dane nogdog korin angkul-angkule,
raris pengayah istri sane mapesengan Rode nyagjagin angkul-angkule punika.
14 Ni Rode raris uning punika suaran dane Petrus.
Krana kalintang seneng,
ipun nenten ja ngampakang korine.
Nanging ipun gelis-gelis mawali mangda nuturang indik dane Petrus wenten ring angkul-angkule.
15 Raris ipun sami mabaos sapuniki,
“Ragane sedek ipit!”
Nanging Ni Rode punika tetep ngamaosang yening anake punika yakti dane Petrus.
Raris anake irika masaur sapuniki,
“Minab ento malekat sane nyaga dane Petrus.”
16 Nanging dane Petrus tan pegat-pegat nogdog korine.
Tatkala ipun sami ngampakang korine tur nyingak dane Petrus,
irika ipun sami angob pisan.
17 Nanging dane Petrus ngicen tanda nganggen tangan mangda ipun sami mendep.
Tur dane Petrus nyeritayang punapi caran danene katuntun medal saking buine olih Sang Hyang Tunggal.
Raris dane mabaos sapuniki,
“Ceritayang ja paindikane puniki kapining dane Yakobus sane dados penglingsir miwah para semeton iragane sami.”
Raris dane Petrus medal saking genahe punika luas ka genah sane lianan.
18 Benjang semengane makasami tentarane sane majaga irika pada biyut.
Ipun saling takenang indik napi sane mamargi ring dane Petrus.
19 Raja Herodes mrentahang tentarane mangda ngrereh dane Petrus nanging ipun sami nenten sida manggihin dane.
Punika mawinan raja Herodes mrentahang mangda tentarane sane nyaga dane Petrus punika kapreksa raris kapademang.
Raris raja Herodes luas saking Yudea nuju Kota Kaisarea tur meneng irika.
Raja Herodes Padem
20 Kaceritayang mangkin,
raja Herodes kalintang duka kapining warga Kota Tirus lan Kota Sidon ring Propinsi Siria.
Punika mawinan warga kotane punika pada adung ngutus utusan mangda tangkil ring raja Herodes.
Sadereng tangkil ring raja Herodes,
ipun sami nunas tulung tur nglemesin dane Blastus.
Dane puniki pengede sane ngurus purin raja Herodese.
Irika ipun sami nunas dame krana warga saking makakalih kotane punika ngamolihang lakar ajengan saking negerin Herodese.
21 Ring dina sane sampun kapilih olih raja Herodes,
ida nganggen pengangge ageng tur malinggih ring singasanan idane.
Raris ida ngawitin mapidarta ring arepan panjake sami.
22 Panjake sami irika pada masuryak-suryak sapuniki,
“Niki suaran dewa,
nenten ja suaran manusa!”
23 Duk punika,
jeg pramangkin malekat Sang Hyang Tunggal namplak raja Herodes krana ida nenten ngagungang Sang Hyang Pengardi.
Ida padem krana keni penyakit cacingan sane keras.
24 Sasampun paindikane punika pengajahan saking Sang Hyang Pengardi ngancan kasub.
Kenten pada anake sane pracaya ring Sang Hyang Yesus ngancan ngakehang.
25 Sasampune dane Barnabas lan dane Saulus nyerahang sumbangan kapining para penglingsir ring Kota Yerusalem,
raris dane mawali ka Kota Antiokia.
Dane makakalih ngajak dane Yohanes Markus luas sareng-sareng.